المشهد الأول
المكان أفغانستان
السيناريو : يلا يا جماعة نحارب الشيوعية هاتوا لنا جماعة بن لادن وإغسلوا لنا مخهم بإنه الجهاد المقدس
طاخ طيخ طاخ هيه هيه العمارة وقعت .... أيه الحكاية برجى التجارة إنهدوا على دماغ الأمريكان وإللى عملها عملاء وشركاء أمريكا فى الحرب على الشيوعية
أصوات الحلفا :معلش يا جماعة خيرها فى غيرها يلا بينا على العراق
المشهد التانى العراق
بوم طاخ طيخ طاخ.. هيه... صدام وقع وإتشنق
وبعد فترة سكوت .... ايه يا جماعة إللى حصل ؟؟؟ أبدا العراق بدل ما تبقى واحة الديموقراطية تحولت لدولة يحكمها الدين وراحت نفوذ أمريكا فى الهوا وخدت لا موأخذة على قفاها ومشيت قفاها يأمر عيش
أصوات أمريكانى معلش يا جماعة خيرها فى غيرها يلا بينا على غزة
المشهد إللى بعده غزة
يلا يا جماعة الديموقراطية جبناهالكم معلبة ومحفوظة على الطريقة الأمريكانى يلا فكوا الصناديق وشموا طعم الحرية والديموقراطية علشان الناس تعيش بالعدل والمساواة
وبعد فترة أيه يا جماعة الحكاية نقبنا طلع على شونه وحماس خدت الحكم ومش راضية ترجعه ورمت خصومها من الشبابيك
أصوات خوجاتى معلش يا جماعة الجايات أكتر من الرايحات يلا بينا على تونس
المشهد إللى بعده تونس
حرقنا لكم بو عزيزيى وولعنا فى البلد هيه مبسوطين؟ وبن على طلع ناصح وخلع وعمل نفسه مات وشبع موت
فترة سكوت.... إنتخابات على الفرازة تونس العلمانية حا يحكمها التيار الإسلامى وسلم لى على السياحة بالمايوة الشرعى والبيرة إللى بالشعير الخالية من الكحول
أصوات أوربيه على أمريكانيه هو فيه أيه هو إحنا كل ما نعمل حاجة تتلخبط إحنا لازم معمول لنا عمل على ضهر قرموط بيسرح فى نهر النيل يلا بينا على مصر
الستارة تنفتح على ميدان التحرير
مظاهرات وهيصة ومعا لإسقاط النظام معا لإسقاط مصر لا لا قصدنا مبارك ...البلد كلها بقت أيد واحدة علشان الأيد التانية نسيناها فى البيت فوضى وبلطجية ومظاهرات مليونية ومحدش شايف شغله والخساير أكتر من الفلوس إللى نهبها مبارك وشلته .... معلش إللى ييجى فى الريش بقشيش
أصوات أمريكانى على فرنساوى أيه الموضوع الدنيا خربت خالص ودهسوا الأقباط فى الرجلين والبرلمان حا ياخدوه الإخوان ويقسموا الكعكة مع السلفيين والجماعة بتوعنا بتوع ينايم وفقراير وإبليس طلعوا من المولد بلا حمص والدستور حا يعملوه على كيف كيف الشيخ حسان طب والعمل ده إحنا جينا نكحلها عميناها يلا بينا نطلع على العقيد نتسلى عليه شوية
المنظر الأخير دمار فى كل ليبيا وجابوها على الأرض الحلفا مع القذافى مسحوا ليبيا من ع الخريطة
الحلفا مع الثوار وهما بيرقصوا حوالين جثة القذافى يلا يا ثوار ورونا النهاية السعيدة بتاعت الأفلام العربى وعاوزين بقى الديموقراطية إللى نفسنا فيها إللى معرفناش نعملها فى أفغانستان وغزة وتونس و مصر يلا بقى فرحوا قلبنا
الثوار يلا ياض إنت وهوا روحوا إلعبوا بعيد دى ليبيا دولة إسلامية وحا نطبق الشريعة ولو ما مشيتوش من هنا حا نجيب أبوسياف يقطع راس التخين فيكم
ينزل الستار وخلف الكواليس يتخانق الحلفا بينهم وبين بعض يعنى إحنا كل إللى عملناه ده وفى الأخر ناخد البومبة الكبيرة وكل ما نحط مناخيرنا فى حاجة نعمل زى شرارة وتنقلب علينا
وفى الأخر يضحكوا مع بعض ويهزروا ويحاولوا يحلوا الفزورة وكل حليف يقول للتانى أنا إنت إنت أنا مين الحمار فينا؟؟؟؟؟؟؟؟
0 comments:
إرسال تعليق