عجبى عليكى يا دنيا دا الكل راح يسيبك

إنتى باقيتى على مين قوليلى مين حبيبك

دنا من تراب يا دنيا يعنى أنا قريبك 

فينا العيب يا دنيا ولا العيب عيبك ... وعجبى

ــــــــــ

الدنيا كلها عِبر ولكل إنسان حكـــــاية 

حكاية اليوم إبتدت وحكاية بلغت نهاية

النهارده إنسان دفنوه 

وإنسان سحبته الداية ... وعجبى

ـــــــــ

با إللى ضهرك إنحنى وعنيك بتشوف طشاش 

وكبرت وجالك زاهيمر وولادك ما بتعرفهاش

وجريت جرى الوحوش فى دنيا ما ديماش 

نسيت تفكر فى يوم هتخرج ملفوف فى قماش .... وعجبى 

ـــــــــــ

يا إللى إنت عمال تبعتر فى الهايفة بالألاف 

ما فكرتش تكفل يتيم مش لاقى عيش حاف

وكان قلبك حجر ومن الأخرة مــــــــا خاف 

هتاخد إيه معــــــاك وأنت متشال ع الكتاف ... وعجبى 

ــــــــــ

يا مصر يا أم الدنيا أعدائك صبحــــــــــــــــــــوا كتـــير 

عاوزينك محلك ســـــــــــــــــــــــــر لا تقدم ولا تغــــيير

وناس ســــــــــاعدتهم على كده وإنعدم فيهم الضــــمير

مصر وصــــــــــــــلت لمنحنى  ، صعب أوى وخطــــير 

والمصرى عمره ما ينحنى ، وهيفضل طول عمره كبير

بقالك ثلاث سنين يا مـــــــــــــصر وأنتى حزينة

زى سفينة شـــــــــارده مش لاقيه شط ولا مينا

نفسى أشوفك فرحانة وأعلق فى شوراعك زينة

ونديكى كل حاجة ، طـــــول عمرك وأنتِ بتدينا .

هو أنت ليه يا بخت معاند معايـــــــا تَمللى
وإن جيت يـــــــوم تراضينى تدينى بالميلى
هو أنت زعـلان منى ؟ لو كنت زعلان قولى
أصل أنت كده يابخت ديمـــــــا للواطى تعلى .

أنا لما بحب ، بحب مــــــــــــــــــــن قلبى
وعمرى ما بلعب بحـــد وبخلص فى حبى
وديما باكون إيجابى وعمرى ماكون سلبى
ولو يوم سيبت حبيبى رح أسيبه من غُلبى  .

إوعاك تتمسك بالدنيــا دا الدنيا مِنفاته
وكل واحـــد فينا هتطلع شهادة بوفاته
فين أبوه وأمــــه فين حمــــاه وحماته
وأوعاكوا حد يندم على أى شىء فاته .

الواطى هيفضل واطى مهمـــــــا كِبر وعِلى
عشـــان معدنه رخيص وعمره ما يوم غِلى
ديما حاسس بنقص مهما زمــــــــــانه حِـلى
قلبه مليان بالحقد على طول وعمره ما خِلى .

أنا عمرى مــــــــا أكل حرام
وإن شالله من الجوع أموت
رح أمــــــــــوت موتة كرام
ويحرم عليــــــــــــــا القوت  .

القلب خلاص مــــــــل
وزهقت م الدنيــــــــــا
دا كـــــــل شىء إختل
ونفسى فى حياة تانية .

الواطى هيفضــل واطى
وعمره مـــــــــــا بيتغير
لـــو عايز حاجة يطاطى
ويفضل فى نظرناصغير.

طول ما أنت فقير الناس منك تتهرب
ولو صبحت غنى  البعيد عنك يقرب

لو أنت فقير تحس فى وطنك إنك غريب
ولو كنت غنى ومتغرب فالكل لك قريب

أصل الناس كده  تحب إللى معاه فلوس
وإللى مامعهوش الناس عليــــــه تدوس

الغنى لـــو بيخرف الناس تسمع كلامه
والفقير لو كان عالم ما حد يرد سلامه

الدنيــا نعيمها زايل والكل فى النهاية متساوى
وإللى يعرف حقيقتها رخيصــــــة وما تساوى

ياللى أنت عايش ع الدنيا عمال تعمل ذنوب
الدنيــــــــــــــا دى فانية و إمتى بقىَ هتوب

يا خسارة  طلعت ما تستاهل 
وقلبى إللى حبك كان جـاهل
لكن أنـــــــــــا إللى أستاهل
لأنــــــــــــــى كنت متساهل

لكن بقول الله يسمـحك وكــتر خيرك
بكرة راح أنســـــــــاك وأحب غيرك

بس أنا بستغرب إزاى إنخدعت فيك
ووهبت نفسى وكـــــــــــل حبى ليك
ولـــــو كنت طلبت عينى كنت أديك
الله يسامحك وأنا مش هدعى عليك
وبكــــــــــــــرة ربنا بذنبى هيوريك

أصل أنت أنانى وما حبتش غير نفسك
ماراعتش حبى وعملت كل إللى نفسك

وصلتنى بحبك لطريق مـــالهوش رجوع
طريق طويل ونهايته قلبى صبح موجوع
ما رحمتش عينى إللى جفت منها الدموع
خليت حياتى ضلمة وطفيت كـــل الشموع

وفى النهـــــــــــــاية بقول لقلبى إنت المحقوق
مش أى إنسان يقول بحبك يبقى صـــــــــادوق
حقك عليا يا قلبى  ومسيرنـــــــــــــــــــا نروق
وباعترف إنى كنت عايشه فى وهم ولازم أفوق

الشاعر/ رضا محمد السيد

ليك حق يـــــــــــــارب تزود علينا الضيق
عشان بعدنا عنـــــــــــــك وضلينا الطريق
وطلعنــا من السجن الظالم وسجنا البرىء
وإللى بياخد الرشوة أصبح حـــــر وطليق
وإللى رفض يدفعها إتحـــــــــول للتحقيق  .... وعجبى
ــــــــــ

أنا إللى عاهدت ربى ماعملش شىء حــرام
ولا أكل  لـُقمة سُــــــــحت ولو وزن الجرام
ولا أصـاحب شخص فاســد ولا وش إجرام
ولو لقمتى من مرتشى يحــرم عليا الطعام .... وعجبى
ـــــــــ
يـــــارب ماليش غيرك يقدر ينجينى
عبـــــــدك طغى عليا وناوى يأذينى
وكل ده عشان أنــــــا متمسك بدينى
طول ما أنت ساترنى مـا حد يعرينى ....... وعجبى
ــــــــــ
من خوفى عليكى يا مصر واللهى مـــا بنامشى
كــــــــــــــل مراكبك وقفت وإمتى بــقىِ َهتمشى
الكــــــل عمال يفتى الفاهم وإللى مــا بيفهمشى
وإللى مش خايف على مصريغور منها ويمشى
ــــــــــ