برلمان الندامة/ د. ماهر حبيب‏

مبروك عليكم برلمان الإخوان... النسخة المعدلة لبرلمان سيد قراره والى سنسمع فيه مقولة سرور بصوت الكتاتنى موافقة موافقة إللى بعده وهكذا سيتم إستبدال الحزن الوطنى بمحظورة الإخوان والف مليون طظ فى مصر وبصراحة صورة الدقون على المنصة زى ما نكون فى مغارة طورابورا وقد تم إختطاف المنصة على أيدى طالبان والقاعدة.

والجواب بيبان من عنوانه فأثناء القسم كل واحد بيحلف اليمين على مزاجه إللى يقول لك قبل القسم وبعده بما لا يخالف شرع الله وكأن الموضوع حا يمشى بس على مزاجهم فلو هو شايف إنه علشان يمشى شرع الله يتخابر مع دولة إسلامية تانية علشان يتأمر على مصلحة مصر من أجل إقامة الخلافة الإسلامية فهو على إستعداد لخيانة القسم ومصر من أجل ما يعتقد أنه الصحيح والتانى إللى بيقولك ولاؤه للثورة ومبادئ الثورة وأحنا لغاية دلوقتى شايفينهم مقطعين هدوم بعض وكل واحد بيقول لك أنا الثورة وفيه مليون إئتلاف ومحدش عارف مين الصالح ومين الطالح.

نيجى لإنتخاب الكتاتنى ب400 صوت من 500 يعنى مش فارق عن إنتخاب سرور بالإجماع مع ‘ن الإخوان حوالى 47 % وهو فاز بنسبة 80 % يعنى الإخوان والسلفين إيد واحدة وجوه البرلمان حا يمشوا إللى على مزاجهم فى وجود ال20% كمالة العدد علشان الصورة تطلع حلوة فمبروك عليكم أغلبية الدقون وتعالوا نتفرج على عينة القوانين إللى حا تطلع وكل المطلوب إن مكتب الإرشاد يطلع قانون ويتبعت فى إيميل أثناء الجلسة يقراه الكتاتنى ويطرحه للتصويت يروح الإخوان والسلفيين رافعين أيديهم موافقة القانون يعدى بنسبة 80% وسلم لى على سيد قراره

وأول تصريح لرئيس مجلس الشعب هو طلبه لمحاكمات ثورية وهى محاكمات لا تمشى تبع القوانين الإعتيادية بل حسب مزاج الثوار أيا كان فكر الثوار يعنى بالمفتشر على هوى الشارع ولا قانون ولا غيره يعنى ننصب منصة فى ميدان التحرير ونجيب إللى عاوزين نعدمهم ونحطهم فى الميدان ويطلع واحد على المنصة ويقول لهم الدين بيقول أيييييه يقولوا إعدام يروح قايل إعدام على بركة الله ويروحوا ساحلين المتهم فى الشارع ويقول لك طبقنا شرع الله والثورة

العينة بينه ودى أول القصيدة وإللى جرى على برلمان الندامة حا ينطبق على دستور مبنى على أحكام دينية مطلقة وستأتى النهاية الدامية والباكية بإختيار رئيس من نفس العينة وعزاءنا من الأن فى المرحومة الدولة المدنية وأهلا ومرحبا بشرطة الأمر عن المنكر والنهى عن المعروف والعصى الكهربائية لمن عصى وحسرة على إللى طلعوا وحا يطلعوا فى ميدان التحرير والحاجة الوحيدة المؤكدة التى سينجح زعماء التحرير هو الفوز بإلتهاب رئوى حاد وسقوط شعورهم من الخضة وساعتها حا نقول لهم إللى أخدته القرعة تاخده أم الشعور