خالع ومخلوع وبينهما مصروائل غنيم حضر الهيصة ووضب الدنيا وعملها وخلع
البرادعى ظبط الأمور وساهم فى الظيطة وفى الأخر عملها وخلع
أسماء محفوظ قامت بالدور المطلوب منها وعند الإنتخابات حست بالهزيمة المبكرة وعملتها وخلعت
شباب التحرير قلب الدنيا وفى الأخر حرق المجمع العلمى وقعدوا يندبوا حظهم فى ميدان التحرير وفى الأخر حا يعملوها ويخلعوا
أحمد زويل ساعد فى الثورة وخد المقلب المحترم من تعديل الدستور وقاعد برة وخلع
شرف عمل وزارة الثورة وخرب الدنيا وخلع
الجزيرة والعربية ولعوا الدنيا وما إدوش فرصة للناس تفكر فى الصح والغلط وبعد إسقاط مصر تماما عملوها وخلعوا
قطر زقت الناس علشان يقلبوا الدنيا ووعدت بالفلوس ولما جه وقت الجد خلعت
أوباما وكلينتون عملوا زى قطر وفى الأخر لا مساعدات ولا يحزنون وعملوها وخلعوا
الشعب المصرى قام بالهوجة وبعدها قطع السكة الحديد وسايق فى الإضرابات والكسل وعملوها وخلعوا
اللهو الخفى عمل موقعة الجمل إللى خربت الدنيا وعملوها وخلعوا
الفلول كانوا مفهمين الناس إنها حا يجيبوا الديب من ديله وساعة الجد عملوها وخلعوا
البلطجية أخدوا فرصتهم ع الأخر وخربوا الأمن وخلعوا
مبارك بعد ما كان فى القمة تحول بين ليلة وضحاها لمخلوع
العادلى خرب الدنيا وفى الأخر تحول لوزير سجين ومخلوع
نظيف وسرور والشريف عزيز قوم ذل وأصبحوا نزلاء بوتو طرة ومخلوعين
الحزب الوطنى بقى منحل ومخلوع ع الأخر
المهم إن مصر بين الخالع والمخلوع عملوا زى تعريف المجمع اللغوى ( إللى إتحرق) للساندوتش الذى عرف بالشاطر والمشطور وبينهما طازج وتحولت الثورة إلى خالع ومخلوع وبينهما مصر و بعد ما ناكل الساندوتش أقصد الثورة حا يجي لنا شويه عسر هضم وناخد شوية مضادات للحموضة ونتعود وننسى لأن لا الخالع عمل إللى عليه ولا المخلوع كان بيعمل حاجة عدلة والضحية هو إللى إشترى الساندونش وكان فكره لحمة ضانى وطلع فى الأخر لحمة مغشوشة وفاسدة
0 comments:
إرسال تعليق