البانجو السياسي/ ماهر حبيب

أكبر عملية نصب فى تاريخ مصر بس بصراحة إللى عاملينها ناس محترفة عارفة هى بتعمل أيه ناس بتخطط وتتكتك وخصوصا فى وجود ناس ساذجة ومبتدئه ولأن الأضبش فى وسط العمى مفتح فمابالك بمفتح وسط عميان يعمل فيهم أيه؟؟؟؟ طبعا يسوقهم زى ما هو عايز وفى الأخر يشكروه ويبوسوا أيديه وعملية النصب الكبيرة بدأت بعد ما قرر شباب ننوس عينه وائل غنيم إنهم ينزلوا الشارع علشان يطالبوا بتحسين الأوضاع وسابوهم الإخوان ينزلوا لو ولع فيهم النظام يبقوا هما بعيد عن الولعة والشياط والنار ما تلسعهومش بل يكسبوا بنط من النظام و يبانوا إنهم ما خرجوش عن النظام بالرغم من إنهم كانوا ممكن يقلبوا عاليها واطيها وطبعا مبارك ساعتها كان حا يعملها جميلة كبيرة ويمكن كان يسلم دقنه ليهم.
لكن لما اللعبة سخنت وبان إن النظام إتلبخ ومش عارف يعمل أيه نزلوا الإخوان وعملوا نفسهم ثورجية وكملوا اللعبة بمساعدة شباب الفيس بوك مع الأصابع الخارجية وإتقلبت الدنيا وخسر مبارك الجيم وكسب الإخوان الجولة الأولى وطبعا المهمة بقت سهلة إذا كانوا فضلوا يلاعبوا مبارك ونظامه القوى مش حا يقدروا يضحكوا على شوية عيال كبيرهم مربى سوالفه ودنجوان عصره.
بدأت اللعبة بمهادنة المجلس العسكرى وضحكوا على الجميع وأقنعوهم بالإعلان الدستورى علشان يعملوا إنتخابات يتم فيها إستغلال الدين فى وسط مجتمع غير جاهز لممارسة أى أنواع من أنواع الديموقراطية والحرية وفى وسط الهيصة إتلعبت اللعبة الكبيرة قوى وهى حدوتة إستقالة أبو الفتوح وخناقته مع الإخوان وشرب الجميع المقلب وصدقوا الملعوب وخالت الحكاية على الجميع من الوزير للغفير لغاية ما التمانين مليون نسيوا إن أبو الفتوح إخوانى علشان اللعبة تكمل.
بعد برلمان قندهار برلمان الندامة ما نزل الملعب دخلوا على الدستور وإن كان معصلج معاهم لغاية دلوقتى وإكتشافهم إن من غير كرسى الرئاسة الموضوع حا يبقى ناقص فراح الإخوان مسخنين الموضوع ونزلوا الشاطر وهما عارفين و متأكدين إن الترشيح مش حا يعيش إسبوعين على بعض وطبعا إضطر المجلس العسكرى يدفع بعمر سليمان لأن المجلس إتخض منهم وبعدين تمت اللعبة وخرج سليمان ومعاه الشاطر وأبو إسماعيل وإفتكر الجميع إن إخوان طظ فى مصر خسر الرهان لكن الملعوب الكبير ظهر فى الصورة لأن بين ليله وضحاها تحول أبو الفتوح للصدارة فى طريقه لإكتساح الإنتخابات من الجولة الأولى وبدا السلفيين الذراع الغشيم للإخوان يدعموا أبو الفتوح وباقى التيار الإسلامى واحد واحد حا يدعموا أبو الفتوح ومش حا نلاقى حد مرشح نفسه منهم غير أبو الفتوح بعد الإخوان ما يسحبوا فى اللحظة الأخيرة المرشح الإستبن إللى ما لهوش حضور أو كاريزما وبكده يبقوا أوفوا بوعدهم إن ما لهومش مرشح إخوانى ويجدوا أنفسهم مضطرين يا عينى وهما قلبهم مكسور إنهم ينتخبوا أبو الفتوح المستقيل ظاهريا من جماعتهم المحظورة.
أبو الفتوح إخوانى قلبا وقالبا أفكاره بتعبر عن فكر المرشد يؤمن بمبدأ السمع والطاعة ولو حد بيفكر يسمع برنامج وتصريحات أبو الفتوح الإخوانى حا يلغى معاهدة السلام مع إسرائيل حا يطبق الشريعة يعنى أى رئيس إخوانى أو سلفى حا يعمل أيه أكتر من المصيبتين دول.....إصحوا لللون بلاش تشربوا المقلب للأخر مرشح الأخوان الرسمى هو أبو الفتوح وما تصدقوش الهجص إن الشاطر أو مرسى هو مرشحهم الرسمى ويا ريت تفوقوا من الهبل إللى إنتوا فيه يا شباب ننوس عينه غنيم يا حبايب السوالف والكرافتات الشيك يا حبايب البرادعى يا حزب الكنبة ممكن تعملوا حاجة واحدة كويسة لوجه الله وحبا لمصر المكسورة تكتلوا ضد مرشح الإخوان أبو الفتوح كفاية إنهم إستعبطوكم فى الإعلان الدستورى والبرلمان ما تخليهومش يشربوكم ميه أصفرة وتلحقوا المركب قبل ما تغرق وياريت تفوقا من هبل الفيس بوك وتلعبوا الجيم بجد واللا حا تفضلوا مبرشمين وغايبن عن الوعى تماما وفوقوا بقى من البانجو السياسي إللى إنتو عايشين فيه إرحمونا بقى

CONVERSATION

0 comments: