أصل إحنا كنا بنهزر/ د. ماهر حبيب

الإخوان يعلنون أنهم لن يرشحوا أكثر من ثلث البرلمان ثم يرشحوا أنفسهم على البرلمان كله ....أصل إحنا كنا بنهزر

مكتب الإرشاد يعلن أنه لن يرشح رئيسا للجمهورية فيرشحوا الشاطر والإستبن ............أصل إحنا كنا بنهزر

القبض على أفراد منظمات حقوق الإنسان بحجة التمويل الأجنبى ثم الإفراج عنهم ............... أصل إحنا كنا بنهزر

رئيس الوزرا يعين محافظ قبطى ثم يلغى القرار .............. أصل إحنا كنا بنهزر

يبلغوا شفيق إنه كسب الإنتخابات والحرس الجمهورى راح يحرسه ويكسب مرسى فى أخر لحظة زى الهدف الدهبى إللى لغاه الفيفا................. أصل إحنا كنا بنهزر

..الرئيس يعيد مجلس الشعب ثم يلغى قراره.................... أصل إحنا كنا بنهزر

الرئيس يقيل النائب العام ثم يرجعه لمنصبه .............. أصل إحنا كنا بنهزر

الرئيس يعلن الإعلان الدستورى الإلهى الفرعونى ثم يلغيه.............. أصل إحنا كنا بنهزر

الغريانى يقول لك بأطبخ لكم دستور توافقى وطلع مسلوق علشان ........... أصل إحنا كنا بنهزر

قنديل يقرر غلق المحلات الساعة عشرة ثم يلغيه..................... أصل إحنا كنا بنهزر

قنديل يقرر رفع الضرائب ثم يلغيه...................... أصل إحنا كنا بنهزر

قنديل يرفع الإسعار ويلغى الدعم عن السولار ثم يلغيه............ أصل إحنا كنا بنهزر

النائب العام الإخوانى الجديد يستقيل ثم يسحب الإستقالة.......... أصل إحنا كنا بنهزر

النيابة تقبض على حارس الشاطر متلبسا بحمل سلاح غير مرخص ثم تفرج عنه ..... أصل إحنا كنا بنهزر

النيابة تقبض على عضو من حازمون بتهمة إمتلاك سلاح ألى غير مرخص وغير مسموح بيه للإستعمال الشخصى ثم تقوم النيابة بالإفراج عنه لما حازم وراهم العين الحمرا كشوا فى جلدهم وقالوا........................... أصل إحنا كنا بنهزر.

المتظاهرين قالوا سلمية سلمية ومسلم ومسيحى إيد واحدة وبعدين قالوا................ أصل إحنا كنا بنهزر

قالوا الجيش والشعب إيد واحدة وبعدين طلعت الحقيقة .................... أصل إحنا كنا بنهزر

وبعدين مادام كل حاجة طلعت هزرا فالشعب بيقول

أنا كنت فاكر مرسى رئيس بجد بس الحقيقة .................. أصل إحنا كنا بنهزر

إحنا كنا حا ندفع ضرايب  وبعدين.................... أصل إحنا كنا بنهزر

إحنا كنا ناوين نشتغل ...................... أصل إحنا كنا بنهزر

إحنا كنا ناويين نقعد فى البلد ..................... أصل إحنا كنا بنهزر

وطبعا ما دام الحاكم وجماعته عمالين يهزروا والشعب كمان من غلبه حا يهزر وتبقى الدنيا هزار فى هزار والنتيجة  الدنيا خربت وإنتوا قاعدين تهزروا طب خليكوا كده بتهزروا على طول وشوفوا إللى حا يجرى لكم وبعد ما كانت بلد بتاعت شهادات صحيح بقت بلد بتاعت هزار صحيح