رسالة من تحت الماء البورسعيدى/ د. ماهر حبيب

لو كنت قاعد قدام التليفزيون مستنى خطاب محمد مرسى و إنت جنبك كيس لب تقزقزه أثناء الخطاب فسوف تصاب بالقلق لأن كيس اللب خلص ومرسى لسه ما طلعش عليك بطلعته البهية اما لو كنت قاعد وقدامك كيس فشار فتصاب بالتخمة والإنتفاخ من كتر شرب الميه علشان تبلع الفشار وسوف تصاب بإرتفاع بالضغط من كتر الملح الموجود فى الفشار أما لو ماكانش عندك مقدرة على شراء اللب والفشار فسوف تفش غلك بإنك تشرب ميه علشان ريقك نشف من كتر القلق على فاتورة الكهربا إللى حا تلسع سعادتك من توليع النور والتليفزيون حتى وش الفجر علشان تنطرب بغناء الدكتور مرسى وهو بيغنى على المحور وحا تفضل رايح جاى على الحمام من كتر القلق وشرب المية.
ولو كنت من تعساء الحظ إللى صبروا للأخر وإتفرجوا على مرسى بعد قرابة 6 ساعات من موعد إذاعته فإنت مش حا تخرج عن 3 شخصيات واتمنى إن القارئ ما يكونش واحد من التلاتة فالنوع الأول عاطل عن العمل وما عندهوش شغل وبينام بالنهار ويسهر بالليل علشان الناس ما تشفهوش ولا هو يشوف الناس ويفتكر إنه عالة على المجتمع ومش لاقى ياكل ومش لاقى شغل وفيه حد بيصرف عليه والبيت كله حالته كرب وبيفش غله فى إنه يتفرج على التليفزيون حتى لو كان طق حنك من رئيس جماعة الإخوان.
والنوع التانى هو الناس المصابة بالشيزوفرينيا والتى تصاب بهلاوس سمعية وبصرية ويتهيئ لها حاجات لا حصلت ولا حا تحصل فهذا النوع من المرض يتصور إنه لو قعد إستنى مرسى حتى لوش الفجر فلأنه حا يسمع الحلول إللى حا تغير الكون مثل إن الرئيس مرسى حا يحل جماعة الإخوان ويحط معظمهم فى السجن إتقاء لضررهم للمجتمع أو إنه يحطهم فى مصحة نفسية لإعادة تأهيلهم كى ما يتحولوا إلى مواطنين صالحين لهم نفس الحقوق وعليهم نفس الواجبات المطلوبة من كل مواطن مصرى صالح وطبعا النوع ده من المتفرجين حا يصابوا بنكسة شديدة بعد سماع الخطاب لأنهم إكتشفوا إن خطاب مرسى خالى من الخيال العلمى والسياسي بل معدوم الدسم والصدمة دى حا تدفع هؤلاء المشاهدين إلى زيادة جرعة العلاج نتيجة نوبة الهيجان إللى حا يصابوا بيها بعد الخطاب.
والنوع التالت من المشاهدين هم أهل مرسى وعشيرته ودول إللى محمد مرسى شخصيا بينده على محمد علشان يتصل بيهم فى البيت علشان أنا (محمد مرسى) حا أطلع دلوقتى فى التليفيزيون ودول بالظبط زى ما تروح ماتش كورة والكاميرا تيجى عليك صدفة يقوم أهلك وأصحابك تيجى لهم حالة إيفوريا لأنهم طلعت على التليفيزيون ومصر كلها شافت طلعتك البهية.
ونرجع بقى للى شاف الحوار لايف أو شافه متسجل بعد إضافة الضحكات والقهقهات على طريقة برنامج البرنامج فلا بد كلكم قعدتوا تضحكوا لما الدمعة فرت من عينكم لما مرسى قال إنه رايح بورسعيد أولا لأن أهل بورسعيد حا يكونوا قاعدين مستنينه على أحر من الجمر علشان كل بورسعيدى حا يصر إنه ياخد مرسى البيت لواحده فى الحارة المزنوقة علشان يعمل معاه أحلى واجب وطبعا أهل بورسعيد حا يتخانقوا ويمكن يقطعوا بعض على مين حا ياخد الدكتور لبيته الأول علشان يكون ليه الشرف الأكبر ويتحكى ويتحاكى على مرسى فى بورسعيد  إللى حا يخرج من حارة حارة زنقة زنقة وطبعا بالرغم من إنى مختلف تماما مع الريس مرسى ومش طايق إللى بيعمله بس مش لدرجة إنه يروح بورسعيد ده برضه إنسان لحم ودم وعنده أولاد والرحمة حلوه فمعلش كلنا لازم ننبه الرئيس سواء كنا معاه أو ضده لأننا مش معقول نخليه يغنى من تحت ماء القناة وبورسعيد ويقول لو أنى أعرف خاتمتى ماكنت بدأت

CONVERSATION

0 comments: