مغارة على بابا/ د. ماهر حبيب

فيه حاجات بتتقال وتعدى من غير ما تلفت إنتباه حد وبعدين نغنى على الأغنية ونصدقها ونعيش فى وهمها وتنطمس الحقيقة ونعيش فى دنيا كاذبة وزى ما بيقولوا الناس نعيش فى الغيبوبة ففى ظل الحديث عن إنهيار الإقتصاد وتآكل الإحتياطى النقدى من 35 مليار دولار إلى 15 مليار وتناقص الموارد فى السياحة والتصدير نجد معلومة أن من أبطئ تآكل هذا الإحتياطى كان تحويلات المصريين يعنى من غير التحويلات كان الإحتياطى وصل لمرحلة ما تحت الخطر وطبعا الكلام الحلو ده رسالة معناها إن المهاجرين أو المهجرين شافوا إن مصر فى زنقة راح كل واحد بعت كل إللى يقدر عليه علشان ينقذ أهله وعشيرته من الجوع لكن كالعادة كل الناس شربت البالوظة وشربت المية الصفرا وقالت يا سلام كتر خيرهم مصريين المهجر على الشهامة والمجدعة ومحدش خد باله من المعلومة على بعضها.
قال لك قال أيه إن فى عام 2010 كانت التحويلات 8 مليار وفى عام الرمادة الإسود 2011 زادت التحويلات إلى 12 مليار وفى عام مرسى وإخوانه زادت التحويلات من الأهل والعشيرة إلى 18 مليار وإن الزيادة الكبيرة جت من المصريين الأمريكان ثم من الإمارات وبعدين السعودية والكويت لكنى بأقول مع صحة المعلومة عن كمية الزيادة بس حكاية إن تحويلات الأمريكان كانت نمرة واحد محل شك كبير لأن المصريين إللى فى أمريكا نسبة كبيرة منهم إن ما كانوش أغلبية أقباط وإنتوا عارفين إن الأقباط مش بتوع مغامرة وفتحة صدر فهم بيبعتوا تحويلاتهم لسبب من إتنين يا يساعدوا أهاليهم يا يشتروا حتة شقة أو عقار علشان لما ينزلوا مصر يلاقوا حته محترمة يعيشوا فيها وبعد نكسة يناير أهل الأقباط إللى محتاجين مساعدة يا فضلوا زى ما هما يا إما قلوا بحكم إن كتير منهم طفش أو فى طريقة يهرب من طالبان مصر ويهاجروا من مصرستان قبل ما يعلن حاكم مصر الجديدة الجزية عليهم يعنى حكاية إن الأقباط زودوا الفلوس إللى بيبعتوها لمصر محل شك لأن مفيش واحد قبطى عاقل ممكن يشترى حاجة فى الوضع الحالى إلا لو كان بيفرق فلوسه وكل واحد عايش برة نفسه حاطط أيده على قلبه خوفا من إن ما إشتراه أحسن يستولى عليه الدهماء وتروح فلوسه فى شربة مية.
نقطة تانية مهمة هى إن الإمارات جاءت فى المرتبة التانية وإنتوا عارفين إن عدد المصريين فى السعودية أكتر عشرين مرة من عددهم فى الإمارات يعنى بالبلدى كده كل ما واحد مصرى إماراتى يبعت عشرين دولار المصرى السعودى يبعت دولار وطبعا الحكاية مش كده خالص لأن المصريين إللى فى السعودية أغلبهم بيبعت كل إللى بيكسبه ويفيض لمصر يعنى المفروض إن السعودية تبعت عل الأقل 5 أضعاف إللى بيبعته الإمارات لكن واضح إن كنز الإمارات إنفتح بالهبل بعد ما إتضحت الرؤية وركب الإخوان على نفس مصر إلى ما شاء الله فخرجت السيولة لتدعيم أهلهم وعشيرته وهو ما تنبه له حكام الإمارات لغاية ما حطوا أيديهم على خلية الإخوان بالإمارات التى تم القبض عليها من أصحاب شركات ودكاترة ومهندسين كانوا ممولا رئيسيا لإخوان المحظورة وفى نفس الوقت محرك لتدبير إنقلاب الإخوان للإنقلاب على الإمارات ويستولوا على خزنة الشرق الأوسط وده برضه بيفسر فزع الدكتور مرسى عليهم فبعت لهم رئيس مخابراته هو شخصيا مع مساعده هو شخصيا علشان ينقذ أصحابه ومموليه هو شخصيا وأنا شخصيا بأعتقد إن تحويلات الإمارات حا تقل بعد ما شلال فلوس الخلية الإخوانية حا يتوقف.
وده بيفتح ملف مهم كل الناس عارفاه ومطنشه عليه أو مش قادرة تفتح بقها هو الإخوان بيغرفوا الفلوس دى كلها منين؟ البلد حالها بالبلى وهما كتنظيم ما عندهومش أى نقص فى سيولة أو عجز فى صرف على زيت وسكر لللى يصوت لهم إنتخابات صرف بالهبل إستفتاء صرف بالعبيط مراكز ومقارات أحزاب من غير حساب وميزانية أعتقد أد ميزانية مصر كلها وكل ده منين وبمجرد ما إنفتح الباب ومشى البعبع بتاعهم 14 مليار دولار دخلوا مصر فى  من الباب الرسمى للتحويلات فى سنتين ده غير الفلوس إللى فى الشنط وإللى تحت الترابيزة فيا عالم يا هووووه حد يقول لعلى بابا هو سر باب المغارة فين وبكرة نقعد ع الحيطة ونسمع الزيطة لما ويكيليكس تفضح المفضوح ويبان كل حاجة على أصولها علشان نعرف مغارة على بابا فين

CONVERSATION

0 comments: