صرتي إن مرقتي تمرقي من بعيد متل الكأنك م َ بتعرفيني
مَ بريد منك مرحبا ولَ بريد إن كان ما بدك توافيني
عطف وحنان مفبرك وتقليد مهما تبور وتمحل سنيني
وإنك تمري متل باقي الغيد ترمي التحية وما تحاكيني
بريدك عََ درب الحب نبع جديد وكل يوم كاس جديد تسقيني
وعَ مروج من جمر وتلج ونبيد اصحى وقلك هون خليني
جرح الهوى ما لو دوا بيفيد غيرك كفى هجران داويني
وطول الجفا فيِّ الأسى بيزيد ما حللو دينك ولا ديني
خايف يضيع العمر بالتنهيد وخايف ان طال الهجر تنسيني
وتمرق سنين وعيد بعدو عيد ومن خاطر الأحلام تمحيني
ويمحل هوانا وطيب لمْواعيد ويدبل حلاكِ الكان يغويني
والياسمين يباس عَ القرميد والموت يطويك ِويطويني .
سوريا - محردة .
0 comments:
إرسال تعليق