يا خَيْ روحي.../ يوسف جبرين
يا إبن آدم مَصدرَك غبرةْ سَرابْ
السرّْ بوُجودَك جاهلو وما بيجهلَك
لا فيك تثْـبُت جيت من كمشةْ تراب
وبتقرّْ أنّو النقّصَكْ ما كمّلَك
ولولا سْألتْ بتشكِّك بردّْ الـجواب
اللّي كوّنَكْ عالـخير حتى يوصّلك
ودّا رُسل يهدوك عا دروب الصواب
وبرْيو كْفوفو مِن كترْ ما غربلَك
وتا تْشوف إنّو لْكُل فانـي في حساب
مَلِك القَصرْ الكبير مـجدو ما امْـمتلَك
الراحوا تا يشكوا للملك فتحوا البْواب
لقيوا الفنا بالقصر قاضي عالـمَلَك.
**
شو قصتك يا موت ما بتموت جوع؟
تا تْصال ليّي ومعتبر إني شقي
بَعدي على سوزان عم إذرف دموعْ
حرقة بقلبي ولكن خدودي سقي
يا مخايل اللي تركتْ لوعة بالرْبوع
شيّال حمل الـهمّ غيري ما بقي
غيابك جمر وقّاد أحمر بالضلوع
ما بينطفي من القلب حتى نلتقي
**
يا دهر يا غدار. شو بتريد؟
من الضاع عمرو شْـموع مـحترقة
كل عامْ حِمْلو حِمل عم بتزيد
وصارت خدودو من الصفع زرقة
للموت ما في واسطة بتفيد
الـمخلوق مارق بالدني مرقة
واللي بيقرا العمر بالتحديد
بقلّو اْنْ سرق أحبابنا سرقة
الـمحزون غطّو في بْـحور جْليد
لـمّا بيبكي عا فْراق الـخَيْ
بْتِكْوي خدودو دمعة الفرقة
**
يا خيْ روحي زدتْ فيّي الاكتئابْ
الـمنْ يوم أهلي ضلّ رازح مَطرحو
وزادو جروحي جروح شتّى بالغيابْ
وما تركتْ صاحب تا بكي من جْوارحو
وتا تشوف فيّي شو جرى بعد الـمَصابْ
نـحل الفكر ما عدتْ إجدر سَرّحو
بـحيث الـحزن لو غفْ جيشو عالعشابْ
بـِيشكّ بيرق للمحِلْ عا مَسرحو
وبيصير سبع البَرّ لتعالب الغابْ
مَكسر عصا لِـمْ هيبتو بتْشَلّحو
والنّسر ما بيكنِّس بْريشو التراب
إلاّ إذا الأقدار كسرِتْ جانـحو.
**
