باقة زهر/ فؤاد نعمان الخوري


بكيِت قهر، لكن ما ركعِت للقهرْ:
سيدني عم تقاوم بباقات الزهرْ...
ورد وصلا
منهُن قلب سيدني انتلى،
وصلِت هدايا العيد من نصّ الشهرْ!
سيدني...الأميره الهانيِه:
مين لْ سرَق عيدِك
يا امّي التانيِهْ؟
وجرّح كرَم إيدِك
الحلوه الحانيِهْ..
وخزّق مناديل البراءَه بثانيِهْ؟
الزنبق سياجْ
الفلّ صرخة احتجاجْ...
وكلّنا باقة زهرْ
ومشكّلِه الألوان،
والعنوانْ:
حريّة الإنسانْ
وسيدني العصيِّه عَ الدهرْ!

CONVERSATION

0 comments: