ريم/ سمير سليمان لحلوح .

 كنتي لعندي تجي ونعمِّر السهرات
 وتبوح سر الهوى المكنون عيناك ِ

 صرتي تجي بالحلم ع جوانح فراشات
ومن دون حس ووعي افرح بمرآك ِ

 ياما بحياتي شفت في هالدني حلوات
 لكن مَ هفّ القلب إلا لَ ملقاك ِ

غني معنَّى إلك وانت ِ الرباعيات
 تشدي بليل الهوى وقلك مَ أشقاك ِ

 معدم كواني الفقر وانتي بنت زاوات
عندك جواري وخدم عا طول ترعاك ِ

  وتتبسمي وتضحكي ونبقى سوا ساعات
ويجوح فينا الهوى عا نار نجواك ِ

             ماكنت أعرف قبل انوالهوى مرَّات            
 مجنون أعمى بلا فرقان لولاك ِ

            شاهد علي ِّ القمر والليل والنجمات            
 الكانو بليالي السهر يغفو عَ شباكي

           ياما لواعج صَبَا ولوعة شروقيات              
وأوف وعتابا وزلف هالقلب غنَّاك ِ

           حدك جميع النسا عا طول مكسوفات                
قديش رب السما تأنَّى لسوَّاك ِ

           جبينك بليل الدجى عَ العالم تريات          
 وبيغار حتى الورد من طيب ريَّاك ِ

           عيونك بحور وسما ومواسمك جَّنات                
  نيَّال يلي ملك قلبك وخلاك ِ

 تدوبي حنان ووفا إن ما عاد عصريات    
 وقال اعذريني خَلَصْ ما عاد انساكِ

 والعنق جيد الظبي الوارد على الميَّات      
 وشفاف جوري حما من لونها شاك ِ

 وعقبان صدرك حَرَسْ عن خمس دوريات
 يا ويل قلب البري الما كان يسلاكِ

  وما بين مد وجزر بتلاعب النسمات
 شلال شعر انهمر لليل بيحاك ِ

 انت ِ الربيع المضى وانتِ الربيع الآت  
ومهما يمرّ الزمن رح ضل اهواك ِ

 وشفتك وجن الهوى من جديد والنظرات  
  سبحان رب السما الخلقك مَ أحلاكِ

 تمشي ويشكي الخصر وتزيدك الخطوات
 رقه ودلال وحلا ويلاه مَ قساك ِ

 قرّبتْ شم العطر عَ خدود كمرايات
  قلت ِ يا شاعر كفى وسألت شوباكِ

           اتطلعت شفت الورد دابل على الوجنات  
   واحتار عقلي وقلت ياريم رجواكِ

           ما عاد عندي قلب يتحمّل الصدمات      
  شهرين صرلي وأنا لايب عَ فرقاكِ

           لَ تعامليني بجفا وتزغزغي النيات      
   ما خنت عهد الوفا ولَ القلب جافاك ِ

          ولما عَ خدك شفت عمْ تكرج الدمعات      
 وعرفت انو خبيث الداء أضناك ِ

          حسيت قلبي هوى جوَّات صدري مات    
 والعين خان َ الدمع وبكيت أنا معاك ِ

          وهونيك ع َ المنحنى العندو لنا حكايات    
  مشوار رحنا.. وطول الدرب أعياك ِ

         وما بين ضحك وبكي قلتي إلي هيهات    
  وراسك ع َ صدري تكى تالنوم وافاكِ

         تمنيت لو ترقدي جوَّى القلب بالذات    
    يما تضلي معي أوموت  ويَّاك ِ

        وحياة رب السما الإنجيل والتوراة        
   رح ضلْ باقي العمر عايش عَ ذكراك ِ.

 محردة .