جمهورية التوك توك/ د. ماهر حبيب

أخيرا قامت جمهورية التوك توك بقيادة الرئيس مرسى على أنقاض جمهورية مصر المدنية بقيادة المسجون مبارك ولتحل السيدة نجلاء محل جيهان وسوزان وليدخل مرسى ومعه أهله وعشيرته من باب القصر الجمهورى ليخرج المواطنون من الشباك لنبدأ عصرا جديدا من الخطابة عالية الصوت وقد يكون أول قرارا يمس المواطن الذى يستمع لخطب السيد الرئيس هو توزيع كاتما للصوت لكل مواطن يضعه فى أذنه حال قيام الرئيس بالخطبة يوم العيد وباقى أيام السنة المفترجة.

لقد خرج علينا الرئيس الجديد بخطاب العرش الذى يشرح فيه رؤيته الجديدة لجمهورية مصر لنفاجئ بأنه خطاب عاطفى يصلح أن يكون خطبة جمعة فى مسجد الثورة إحتفالا بمقدم العيد فقد خلى من السياسة وكان الخطاب خالى من بروتينات الرؤية ودهن الفكر وسكريات الحياة السياسية المصرية الجديدة ولكن لأن مصر اليوم فى عيد فقد نزل الرئيس ينقط فى الفرح ويحيى العريس والعروسة والمعازيم وأبو العروسة وأم العريس وإسكندرية والشرقية والغربية وكفر الشيخ وشرمه ثم وضع اغنية محمد منير تعالى نكتب أسامينا الفله جنب الياسمينه لكن الشريط سف فنسى البحيرة والقاهرة والجيزة وإضطر يعيد الشريط كله فى ميدان التحرير.

لكن النقطة الخطيرة التى أرسى قواعدها الدكتور مرسى هو تقنين لمهنة غير رسمية بل يحاربها القانون ويتململ منها الناس ويضجون بالشكوى منها لكن السيد الرئيس وضعها فى مصاف الوظائف العليا فى المجتمع بل تفوق أهمية الصحفيين والإعلاميين والفنانين وهذه المهنة الخطيرة هى سواقين التوك توك وده إن دل على شيئ فهو يدل على إن الرئيس مرسى قرر إنه يمشى على مبدأ خالف تعرف لكل ما كان موجود أثناء حكم مبارك سواء كان صح أو غلط فلو حكومة مبارك بتمنع التوك توك فحكومة مرسى ستحول التوك توك إلى وسيلة المواصلات الرسمية ومش بعيد نلاقى الرئيس رايح القصر الجمهورى بتوك توك أبيض وقدامة توك توك أحمر ووراه توك توك برتقالى.

يا سيادة الرئيس بغض النظر عن رأيك فى التوك توك لكن لازم حضرتك تعرف قد أيه الناس حطت صوابعها فى الشق من التوك توك وسواقينه وحجم المشاكل إللى بيعملوها وأقلها إنهم أكتر نا س بتمشى عكس الإتجاه ومخالفة قواعد المرور إللى كان الفريق شفيق وعدنا وكلنا عارفين مين إللى خلى بيه إنه يرجع المرور والنظام للشارع فى 24 ساعة لكن بعد تحية سيادتك ليهم أعتقد إننا فى حاجة ل 24 سنة علشان نقدر نلمهم ونرجع المرور تانى .

حاجة تانية إذا كان مبارك عنده إحتياطات أمن على أمنه الشخصى فالرئيس قرر إنه يلغى كل قواعد الحراسة ويفتح صدره وجاكيتته علشان نعرف كويس لون القميص وأنا بأقول لسيادة الرئيس إن أمن الرئيس حتى فى جمهورية الموز مختلف عن أن أى شخص أخر فمين يضمن لسيادتك إن مفيش واحد مخه ضارب إنه يقوم بعمل مجنون يضر سيادتك وساعتها الحدث مش حا يكون إعتداء على عضو فى الجماعة المحظوظة أو المحظورة لكنه إعتداء يمس مصر كلها لأننا شئنا أم أبينا أنت الرئيس لغاية ما تخلص مدتك على خير فبلاش حكاية فتح الجاكتة لأن فى جمهورية التوك توك الجديدة الناس ما بقتش هى الناس وما حدش ضامن بكرة ممكن يحصل أيه ومصر مش ناقصة كوارث اليومين دول كفاية لأن إللى فينا مكفينا وزيادة وأدينا قاعدين نتفرج هل سنتحول لعصر الصواريخ والفضاء ونطلع نكتشف الكون والا حا نقعد نتفرج على سواقين التوك توك وهو بيقول لك توصيلة لأخر الشارع بجنية!