القصة ما عادت حراك شعبي يقدر ما هي حراك حب الظهور وخلق زعامات جديدة أو سميهم ملوك جمال الزبالة ، كان العالم برا يشيد  بلبنان ويتغنى بجمالو وبالاكل اللبناني اللي بحراكن العبثي صار زباله وعملونا كلنا زباله. والله عيب!

كتبت عن الحراك من مدة ونصحتهم يحصروا مطاليبهم ويافطاتهم بمطلب واحد هوي الزام النواب ومحاصرتهم بالمجلس ومنعهم من الخروج واجبارهم على انتخاب رئيس جمهورية لحتى نبطل نشوف صعاليك الزمان اللي عم يدعي أهزلهم انو هويي رئيس جمهورية

بعدين هالتهجم عالقوى الامنية وتحديها بقصد استفزازها وهدر معنوياتها وبالتالي اتهامها كذبا انها عم تعتدي عليهم، ليش؟

والتلفزيونات اللي وقفت برامجها وصارت تتبارى باظهار السفهاء والمتطاولين على كرامات الناس شو الو سبب! غير قبض الشيكات من مصادر مشبوهة تعويضا عن الاعلانات المتوقفة عمدا وخدمة لجهات سياسية مغرضه.

حلكن تتوقفوا عن هالمراجل المعفنة وتفتشوا على طريقة مهذبة ومجدية توصلكن للمطالبة  المحقة بالاصلاح.

أشدنا بمظاهرتكن يوم السبت وأيدناها لانها اعطت صورة عن رقي وديمقراطية، بس بعدين صارت مظاهراتكن أشبه بالمسرحية السخيفة والممجوجة.

وحالحكي ما بيشمل طبعا اوادم الناس اللي نزلو يتظاهرو بطريقة حضارية وبدافع وطني واصلاحي شريف ومهذب ومسؤول وبيدلو بتصريحات قيمة ومفيدة.

خلص بيكفي انسحبوا من الشوارع قبل ما تورطوا البلد وتجروه للدمار يا قبضايات الشوارع .